Şərqi və Qərbi Azərbaycan əyalətlərində koronovirus statistikası açıqlanıb.
Təbriz Tibb Elmləri Universitetinin rektor müavini Abbasəli Dürüsti mediaya verdiyi açıqlamada son sutkada Şərqi Azərbaycan əyalətində hazırda gündəlik gündəlik yoluxma sayının 100-130 arası olduğunu deyib.
O, hal-hazırda əyalət xəstəxanalarında 360 koronovirus xəstəsinin müalicə olunduğunu, ötən 24 saat ərzində 4 COVİD-19 xəstəsinin həyatını itirdiyini və Şərqi Azərbaycanın koronovirus ölümlərinin sayına görə İranda 6-cı yeri tutduğunu söyləyib.
Urmu şəhərinin Tibb Elmləri Universitetinin başçısı Məhəmmədəmin Vəlizadə isə son sutka ərzində əyalətdə daha 113 nəfərin COVİD-19 virusuna yoluxduğunu, onlardan 72-nin tibb ocaqlarına yerləşdirildiyi barədə məlumat verib.
Son 24 saatda daha 2 xəstənin həyatını itirdiyini deyən Vəlizadə hal-hazırda Qərbi Azərbaycan xəstəxanalarında 471 koronovirus xəstəsinin müalicə aldığını, onlardan 126-nın reanimasiya şöbələrində yerləşdirildiyini və 27 nəfərin süni tənəffüs aparatına qoşulduğunu bildirib.
Qərbi Azərbaycan əyalətində bu günə kimi 322821 nəfər koronovirusa yoluxub və onlardan 7198 xəstə həyatını itirib.
