Zəngan əyalətinin Taxılçılıq Baş İdarəsinin ticarət işləri üzrə sədr müavini Səttar Rəhməti Zəngan da daxil olmaqla ölkənin bir neçə əyalətində çörəyin kuponla satılmasını təklif edib.
Təbriz Turan TV xəbər verir ki, o vətəndaşlara çörək kartının verilməsi ilə bağlı tədbirlər görüləcəyini bildirib.
Səttar Rəhməti vətəndaşlara çörək kartları verildikdən sonra onların hesabına subsidiya məbləğinin köçürüləcəyini, çörəyin isə azad bazar qiyməti ilə satılacağını deyib.
Məsələyə münasibət bildirən Zəngan Çörəkçilər Birliyinin başçısı Mehdi Bayat bu barədə onlar heç bir məlumat verilmədiyini söyləyib.
Bundan öncə İranın Büdcə və Planlaşdırma Təşkilatı çörəyin kopunla satılacağı və çörək kartlarının verəcəyi barədə xəbərləri təkzib etmişdi.
Qeyd edək ki, xüsusilə son illər İranın əksər əyalətlərində taxıl və un qıtlığının yaranmasına, çörəyin bahalaşmasına baxmayaraq, İran hökuməti Livana böyük miqdarda taxıl və un ixrac etmək barədə qərar verib.
